§ 1

 

Peqatigiiffiup taaguutigaa:

Kallaalit Nunaanni Sulisitsisut Peqatigiiffiat / Grønlands Arbejdsgiverforening.

Naalisarlugu GA.

 

GA-p najugaqarfigaa Kommuneqarfik Sermersooq.

 

GA kattuffik namminersortuuvoq politikkikkut aningaasatigullu immikkut ittumik soqutigisanut pituttorsimanngitsuusoq. Siulersuisut aalajanger-sinnaapput GA sulisitsisut kattuffiinut allanut suleqataalluni ilaasortanngorniarsinnaasoq.

 

 

GA-p siunertaraa nunatsinni sulisitsisut soqutigisaannik sulissussineq isumaginninnerlu - tamatumani ilanngullugit:

 

·           sulisitsisut kattuffeqarnerat ilaasortallu akornanni ataqatigiinneq siuarsassallugu nukittorsassallugulu, ilanngullugit peqatigiiffiup ilaasortaasa akornanni isumaqatigiinngissutaasinnaasunik pinaveersaartitsineq aaqqiagiinngissutaasinnaasunillu qaangiisitsiniarneq.

 

·           akissarsianut sulinermilu atukkanut apeqqutini sulisitsisut ataatsimut soqutigisaannik isumaginneqataaneq, kiisalu sulisitsisut akissarsiortullu akornanni isumaqatigiinngissutinik sapinngisamik pinaveersaartitseqataaneq taamaattoqarsimappallu tamatuminnga eqqissisimasumik qaangiisitsiniaqataaneq.

 

·           Inatsisiliortunut, pisortanut sulisartoqarnikkullu kattuffinnut allanut sulisitsisut soqutigisaannik isumaginninneq, taamaasiornikkut inuussutissarsiortut atugassarisaat siuarsarniarlugit.

 

·           Pikkorissartitsinikkut, siunnersorteqarnikkut allatigullu qaammarsaanikkut sulisitsisunik pikkorissaanissaq.

 

·           Inuussutissarsiornikkut suliffeqarfinnillu ineriartortitseqataaneq, tamanna pissaaq suleqatissarsiornikkut, ataatsimiittarnikkut il.il.

 

 

Peqatigiiffimmut ilaasortanngorsinnaapput sulifffeqarfiit Kalaallit Nunaanni angerlarsimaffeqartutut nalunaarsorneqarsimasut tamarmik. GA-mut ilaasortanngorniarneq pissaaq allakkatigut GA-p allattoqarfianut nalunaarluni, taassumalu ilaasortaq sumiiffimmi immikkoortoqarfimmi ilaasortatut nalunaarsussavaa, takuulli § 6, imm.2, aamma sammisaqarfiit, § 7-imiittut.

Ilaasortat illoqarfinneersuunngitsut kommuneqarfimmi illoqarfiit arlaannut atassuteqarsinnaanertik namminnneq aalajangissavaat.

 

Suliniaqatigiiffiit nunaqavissut taamatuttaaq suliffeqarfiit nunanit allaneersut GA-mut ilaasortanngorsinnaapput, immikkut piumasaqaatit siulersuisut aalajangersagaat malillugit. Taakku toqqaannartumik kattuffimmi nalunaarsorneqartassapput GA-mi qinersinerni il.il suniluunniit.taasisinnaanatik, taaseqataasinnaanatik aalajangeeqataasinnaanatillu.

 

GA-p siulersuisuisa pisortap inassuteqarneragut ilaasortanngorniarluni qinnuteqartoq imaluunniit ilaasortaanerminik nutarsaaniartoq itigartissinnaavaat, qinnuteqartup niuernikkut isigineqarnera GA-p inatsisaani siunertatut immikkoortumut imaluunniit GAp siunertatut iliuusissatullu siunertaanut qaqugumulluunniit atuuttumut akerliuppat.

 

Pissutsit immikkut illuinnartut atuutsillugit inuk sulifffeqarfilluunniit nalinginnaasumik atuuttunit allaanerusunik atugassaqartitaalluni GA-mi ilaasortanngortinneqarsinnaavoq. Ilaasortanngornissamut piumasaqaatit siulittaasoqatigiinnit (siulittaasoq siulittaasullu tullia) aalajangiiffigineqassapput, tamannalu siulersuisut tullianik ataatsimiinneranni akuersaagassiaassalluni.

 

GA-p siulersuisui aalajangersinnaapput GA-mi ilaasortanngorniarnermut qinnuteqaat akuerineqassanersoq.

Tamatumunnga atatillugu siulersuisut sumiiffimmi sulifffeqarfiup inissi-simaffigisaani immikkoortortaqarfimmit kiisalu sammisaqarfimmit sammisaqarfinnilluunniit, suliffeqarfiup qinnuteqartup attuumassuteqarfigisaanit, oqaaseqaatinik piniarsinnaavoq.

 

Ilaasortanngornissaq itigartitsissutigineqarpat qinnuteqartup piumasaqaatigisinnaavaa apeqqutip tullianik ileqquusumik ataatsimeersuarnissami saqqummiunneqarnissaa, qinnuteqaat akuerineqarsinnaaner-soq.

 

Siulersuisut malittarisassiorsinnaapput, tamatumalu kingorna suliffeqarfiit suliffeqarfiutaat suliffeqarfissuarnut atasut GA-mi ilaasortan-ngorsinnaallutik, tamakkua ingerlataat GA-p sammisaqarfiisa iluanniippata.

 

 

Nutaamik ilaasortanngortut ilaasortanngornermut akiliummik immikkut ittumik akiliuteqassapput.

 

Ilaasortat, ilaasortaanermut akiitsoqarnertik pissutigalugu ilaasortaajunnaarsitaasimasut aatsaat ilaasortanngoqqissinnaapput ilaasortaanermut akiitsutik akilerpatigit kiisalu ilaasortanngoqqinnermut immikkut ittumik akileeqqillutik.

 

Akiliutissat annertussusissaat aallartitat ataatsimeersuarneranni aalajangersarneqassapput.

 

 

Ilaasortaanermut akiliutip annertussusissaa aallartitat ataatsimeersuarneranni aalajangersarneqartassaaq ukiut marlukkaarlugit atuuttussatut.

 

Siulersuisut aallartitat ataatsimeersuarnerini tamani GA-p naatsorsuutai missingersuutillu tunngavigalugit ilaasortaanermut akiliutip annertussusissaanik naapertuuttumik siunnersuuteqartassapput.

 

Ilaasortaanermut akiliut tassaavoq tunngaviusumik ilaasortaanermut akiliut akissarsiarititallu annertussusaat tunngavigalugit akiliut. Akiliutit marluullutik kvartalimut kingumoortumik akilerneqartassapput.

 

Tunngaviusumik ilaasortaanermut akiliut ukiukkuutaartumik aalajangersimasumik annertussusilerneqartassaaq, taannalu qaammatisiutit malillugit ukiumi kvartalinut sisamanut agguarneqartassaaq.

 

Akissarsiarititat annertussusaat naapertorlugit akiliut aalajangersarneqartassaaq suliffeqarfiup ukiumi ilaasortaanermut akiliuteqarfiup siuliani aningaasarsiatut A-tut nalunaarutigisimasaasa procentiisa ilaattut, kisiannili qullersani siulersuisunilu ilaasortanut aningaasarsiatut A-tut tunniunneqarsimasut, Erhvervs- og Selskabsstyrelsimut taamaattutut nalunaarutigineqarsimasut, ilanngaatigalugit.

Ilaasortat aningaasarsiat A-t nalunaarutigineqarsimasut siuliani pineqartut uppernarsassavaat akileraaruseriffimmi immersukkap A-10-p nuutinneqarnerata nassiunneratigut imaluunniit naatsorsuutit kukkunersiuisumit atsiorneqarsimasut nassiunnerisigut. Uppernarsaat GA-p allattoqarfianit tiguneqareersimassaaq kingusinnerpaamik ukiup aningaasarsiorfiusup tulliani februarip 15-iat nallertinnagu.

 

Uppernarsaat imm. 6-imi taaneqartoq imm. 6-imi piumasarineqartutut piffissaagallartillugu tiguneqarsimanngippat GA-p allattoqarfiata ilaasortaanermut akiliut akissarsiarititanik tunngavilik imm. 5-imi taaneqartoq missingersuilluni annertussusilersinnaavaa. Missingersuilluni annertussusiliisoqarsimappat uppernarsaat imm. 6-imi taaneqartoq ukiumi ilaasortaanermut akiliuteqarfiusumi februarip 15-iata kingorna nassiunneqarsimagaluarpalluunniit ilaasortaanermut akiliut minninngorlugu iluarsineqarsinnaanngilaq.

 

Ilaasortaanermut akiliut akilerneqartassaaq kvartalit naanerisa tamaasa, tamatumalu kingorna ernialersuisoqalissaaq, takuuk kingusinaartumik akiliinermi il.il. erniat pillugit inatsit.

 

Nutaamik ilaasortanngortut qaammatisiutit malillugit kvartali ilaasortanngorfitsik tamakkerlugu akilissavaat.

 

Suliffeqarfiit aallarterlaat, ukiumi siuliani aningaasarsianik A-nik akiliu-teqarsimanngitsut, ukiumi ilaasortaanermut akiliuteqarfimmi siullermi akissarsiarititat tunngavigalugit ilaasortaanermut akiliuteqartassapput akissarsiarititassatut missingersuutut tunngavigalugit. Akissarsiarititat tunngavigalugit ilaasortaanermut akiliut ukiumi tulliuttumi iluarsineqassaaq akissarsianut aningaasartuutiviit tunngavigalugit, takuuk imm. 6. Iluarsiissutissat aammalu akiliinikippallaarsimanermut/akiliivallaarsimanermut tapiutissat/ilanngaatissat akilersinneqassapput/utertinneqassapput ukiup ilaasortaanermut akiliuteqarfiusup tulliani kvartalimi siullermi akissarsiat tunngavigalugit ilaasortaanermut akiliutip akilerneqarneranut atatillugu.

 

GA-p siulersuisui aalajangersinnaapput ilaasortaq qinnuteqareernermigut ilaasortaanermut akiliummik tamakkiisumik ilaannakortumilluunniit akiliinngitsoortinneqarsinnaasoq, tamanna immikkut illuinnartunik pissutissaqartinneqarpat.

 

GA-p siulersuisui aalajangersinnaapput sammisaqarfik ilaasortaanermut akiliuteqassasoq imm. 3-5-imut taaneqartunit allaannerusumik aaqqissuussaasumik.

 

Ilaasortaanermut akiliutissap kinguartinneqarnissaa GA-p pisortaata akuersissutigisinnaavaa.

 

Ilaasortaanermut akiliut akilerneqareersimasoq utertinneqarsinnaanngilaq, kisiannili takuuk imm. 10.

 

Ilaasortaanermut akiliummut akiitsoqarnerup kingunerissavaa GA-p iluani qinersinerni, taasinerni, aalajangiinerni il.il. taasisinnaanermik annaasaqarneq, tamatumanissaaq ilanngullugu immikkoortortaqarfinni.

 

Ilaasortaq ilaasortaanermut akiliutissaminik imm. 3 malillugu kvartalini marlunni amerlanerusuniluunniit kinguaattoorsimappat peqatigiiffimmit ilaasortaajunnaarsinneqassaaq, allakkatigut ilisimatinneqarnerminiit ullut arfineq pingasut qaangiutinnginneranni akiligassaminik akiliisimanngippat.

 

 

Illoqarfinni tamani tallimanik amerlanerusunilluunniit ilaasortaqartuni GA-p ataaniittumik immikkoortortaqarfimmik pilersitsisoqassaaq.

Immikkoortortaqarfiit nalinginnaasumik ingerlanneqarnerannut aningaasartuutit GA-mit akilerneqartassapput. Tamanna pillugu erseqqinnerusumik malittarisassat siulersuisunit aalajangersarneqassapput.

 

Illoqarfinni imm. 1 malillugu immikkoortortaqarfinnik pilersitsivigineqanngitsuni GA-p siulersuisui kommunimi ilaasortat akornanni inummik attaveqarfigisassamik toqqaassapput.

 

GA-mi ilaasortat tamarmik immikkoortortaqarfimmi ilaasortaapput, kisiannili takuuk § 6, imm. 2, aammalu immikkoortortaqarfimmi ilaasortanngortitsisoqassanngilaq GA-mi ilaasortaanngitsunik.

 

Immikkoortortaqarfinni ilaasortaapput sulifffeqarfiit, illoqarfimmi immikkoortortaqarfiup inissisimaffigisaani ingerlatsisut. Tassa imaappoq, immikkoortortaqarfinnik illoqarfiit amerlaqataattut amerlatigisunik taamaallaat pilersitsisoqarsinnaavoq.

 

Suliffeqarfik illoqarfiit arlalinni ingerlataqarpat, sulifffeqarfik immikkoortortaqarfinni tamani suliffeqarfiup ingerlatsitsiffiini ilaasortatut nalunaarsorsimassaaq.

 

Taamaasilluni suliffeqarfik immikkoortortaqarfinni arlalinni ilaasortaasutut nalunaarsorsimasinnaavoq, GA-mili ilaasortatut ataasiinnartut nalunaarsorsimassalluni.

 

GA-p siulersuisui immikkoortortaqarfinnut malittarisassanik tunngaviusumik suliarinnissapput. Malittarisassat atuutilersinneqannginnerini GA-p siulersuisuini akuersissutigineqartussatut nassiunneqassapput.

 

Immikkoortortaqarfik immikkoortortaqarfimmi siulersuisunit, immikkoortortaqarfimmi ilaasortanit qinerneqartunit, aqunneqassaaq.

 

Ataatsimeersuarnermut aallartitassanik toqqaanermut atatillugu immikkoortortaqarfiit kommuneqarfinni suleqatigiissapput, takuuk § 8.

 

 

GA-mi ilaasortat tamarmik sammisaqarfimmut ilaapput, takuuk § 3, imm. 1. Peqatigiiffimmut ilaasortanngornermi suliffeqarfiup sammisaqarfigisani nalunaassavai, tamatumunngalu atatillugu suliffeqarfiup pingaarnertut sammisaqarfigisamisut pingaarnertut isigisani nalunaarutigissallugu. Tamanna tunngavigalugu suliffeqarfik sammisaqarfiit aalajangersarneqarsimasut ilaannut ataatsimut inissinneqassaaq. Inissinneqarnera siulersuisunit akuersissutigineqassaaq.

 

Ukiumi ataatsimeersuarfiunngitsumi qaammammi martsimi, takuuk § 8, imm. 1, suliffeqarfiit sammisaqarfikkaartumik allakkatigut taasinikkut brancheudvalgimik qinersissapput, pingasuniit tallimanut ilaasortalimmik. Brancheudvalgip ilaasortami amerlassusissai nammineq aalajangissavaa.

 

Tamatuma saniatigut sammisaqarfiit tamarmik ataatsimiititaliamut sinniisussanik marlunnik qinersissapput.

 

Brancheudvalgi inissitsitissaaq siulittaasulerluni.

 

Brancheudvalgit siulersuisunut ulluinnarni aqutsisutut atuutissapput, tassa sammisaqarfinnut tamanut ulluinnarni peqatigiiffeqarnermut politikkimut akisussaasuussagamik. Udvalgi aalajangiisinnaassuseqarpoq ataatsimiinnermi ilaasortaasut ikinnerpaamik 2/3-ii najuuppata.

 

Brancheudvalgip siulittaasua sivikinnerpaamik ullunik 14-inik sioqqutsilluni ataatsimiigiaqqusisassaaq.

 

Brancheudvalgimulli ataatsimiigiaqqusisoqarsinnaavoq tamanna brancheudvalgimi ikinnerpaamik ilaasortat marluk piumasarippassuk.

 

Brancheudvalgit aalajangiineri pillugit allattuisoqartassaaq brancheudvalgimi ilaasortanit akuersissutigineqartussamik.

 

Brancheudvalgip ingerlaneranut aningaasartuutit nalinginnaasut GA-mit akilerneqartassapput. Tamatumunnga erseqqinnerusumik malittarisassat siulersuisunit aalajangersarneqassapput.

 

 

Kalaallit Nunaanni Sulisitsisut Peqatigiiffiata ataatsimeersuarnera, ukiuni akunnattuni (2-mik agguarneqarsinnaanngitsuni) qaammammi martsimi ingerlanneqartartoq, peqatigiiffiup GA-mut tunngasuni oqartussaaffittut qullersaraa.

 

Taamaattorli apeqqutit nukingernartuusinnaasut taasisitsinikkut aalajangiiffigineqarsinnaapput, tamanna suliffeqarfiit ilaasortaasut tamarmiusut ikinnerpaamik 25%-iisa piumasarippassuk.

 

Taamatuttaaq siulersuisut apeqqutit taasisitsinikkut aalajangiiffigitissinnaavaat.

 

Tamatumunnga malittarisassat erseqqinnerusut siulersuisuni ulluinnarni aqutsisunit aalajangersarneqassapput, takuuk § 9, imm. 5.

 

Siulersuisuni siulittaasoq ileqquusumik ataatsimeersuariaqqusissaaq ataatsimeersuarnissaq kingusinnerpaamik qaammammik ataatsimik sioqqullugu.

 

Suliffeqarfiit ilaasortaasut ataasiakkat tamarmik allakkatigut ataatsimeersuariaqquneqartassapput allakkallu ataatsimeersuariaqqusissutit imaqartassapput siulersuisut oqaluuserisassatut siunnersuutaannik, siulersuisut nalunaarutaannik, ukiumut naatsorsuutinik aammalu oqaluuserisassatut imm. e - g-mi siunnersuutinik, takuuk imm. 4, kiisalu qaqugu sumilu ataatsimeersuarnerup ingerlanneqarnissaanik.

 

Ataatsimeersuaqataasussat tassaapput

·           siulersuisunut ilaasortat ataatsimeersuarnermi qinerneqarsimasut, takuuk § 9, imm. 1,

·           brancheudvalgini ilaasortaasut tamarmik,

·           immikkoortortaqarfinni siulittaasut tamarmik taakkualuunniit sinniisussaat kiisalu

·           GA-mut aallartitat kommunenit sisamanit qinigaasut.

 

Kommuneniit aallartitat aalajangersimasumik amerlassusillit kommuneqarfimmiit aallartitatut qinigaasinnaapput. Kommuneni ilaasortat 20-t aallartinnerisa tamaasa ataatsimik aallartitaqarsinnaapput. Kommuneqarfinni immikkoortuni siulittaasuusut kommunemi qinikkat amerlassusaannit ilanngaatigineqartassapput. Kommuneni qinigaasut sinneruttut allakkatigut qinersinikkut ukiumi ataatsimeersuarfiusussami qaammammi januarimi qinerneqartassapput.

Kommuneni aallartitatut qinigaasut kommunemi immikkoortortaqarfiup ataffigisaani, immikkoortortaqarfinni ilaasortaasunit aamma taakku akornanniit qinerneqartassapput.

 

Ileqquusumik ataatsimeersuarnermi makkua oqaluuserineqartassapput:

 

a) Aqutsisumik qinersineq

b) Aallartitat peqataasinnaanerannik akuersissutiginninneq aammalu taaseqataasinnaasut amerlassusaannik akuersissutiginninneq

c) Siulersuisut nalunaarutaat

d) Ukiumut naatsorsuutit kukkunersiorneqarsimasut akuersissutigineqartussatut saqqummiunneqarnerat

e) Siulersuisut siunnersuutaat

f) Brancheudvalgit siunnersuutaat

g) Ilaasortat siunnersuutaat

h) Ilaasortaanermut akiliutip kiisalu siulersuisut brancheudvalginilu ilaasortat akissarsiaasa aalajangerneqarnerat missingersuutit saqqummiunneqartut tunngavigalugit

i) Siulittaasumik qinersineq

j) Siulersuisunik sinniisussanillu qinersineq, takuuk § 9, imm. 1

k) Kukkunersiuisumik qinersineq

l) Tamalaat

 

Suliffeqarfiit ilaasortaasut brancheudvalgillu ileqquusumik ataatsimeersuarnermi oqaluuserisassatut siunnersuutaat siulersuisunit tiguneqareersimassapput ukiumi ataatsimeersuarfiusumi februarip aallaqqaataa nallertinnagu.

 

Ataatsimeersuarneq aqunneqassaaq aqutsisumit ataatsimeersuartunit qinikkamit, taannalu siulersuisuni ilaasortaassanngilaq.

 

Ataatsimeersuarnermi aallartitat tamarmik ataatsimik taasisinnaatitaapput.

 

Suliffeqarfiit GA-mi ilaasortaasut tamarmik ataatsimeersuarnermi peqataasinnaatitaapput oqaaseqarsinnaatitaallutillu.

 

Ataatsimeersuarnermi apeqqutit tamarmik amerlanerussuteqarnikkut aalajangiiffigineqartarput, taamaallaat aalajangiiffigisassat makkua, ataatsimeersuarnermi aallartitanit ikinnerpaamik 3/4-imik amerlanerussuteqarluni aalajangiiffigineqartussaasut pinnagit:

·      Malittarisassat allannguutaat.

·      Ilaasortanik ilaasortaajunnaarsitsineq.

 

Ataatsimeersuarnermi aallartitat ikinnerpaamik pingasut piumasarippassuk taasineq allakkatigut ingerlanneqassaaq.

 

Siulersuisut pisariaqarsorippassuk, imaluunniit suliffeqarfiit ilaasortaasut tamarmiusut ikinnerpaamik 25%-iisa imaluunniit brancheudvalgini ilaasortaasut tamarmiusut ikinnerpaamik 50%-iisa tamanna siulersuisunut allakkatigut kissaatigippassuk, immikkut ittumik ataatsimeersuartoqassaaq. Qinnuteqaatip tiguneraniit kingusinnerpaamik qaammat ataaseq qaangiutsinnagu siulersuisut immikkut ittumik ataatsimeersuariaqqusissapput sivikinnerpaamik qaammammik ataatsimik piffissaliillutik, oqaluuserineqartussat nalunaarutigalugit.

 

Ataatsimeersuariartunut tamanut angalanermut najugaqarnermullu aningaasartuutit tamaasa GA-p akilertassavai.

 

 

GA siulersuisunit aqunneqarpoq, tassaasunit ataatsimeersuarnermi siulittaasoq qinigaasoq kiisalu brancheudvalgini ataasiakkaani siulersuisut, tamatumalu saniatigut peqatigiiffiup kommuneni tamani aallartitamit ataatsimik. Kommuneni sinniisaasut taakku arfineq-pingasut kommuneni ilaasortaasunit qinigassanngortinneqartassapput aamma taakku akorniniit qinerneqartassallutik.

Sinniisussap Qaasuitsup Kommunianeersup aappaa Nuussuup avannaaneersuussaaq.

Qeqqata Kommunianit ilaasortaq ataaseq Maniitsumeersuussaaq ataaserlu Sisimiuneersuulluni.

Kommuneqarfik Sermersuumit ilaasortaq ataaseq Nuummeersuussaaq ataaserlu Nuup avataaneersuussalluni.

Kommune Kujallermit ilaasortat kommunimi illoqarfinnit assigiinngitsunit marlunneersuussapput.

 

Kommunenit siulersuisuni ilaasortat tamarmik sinniisussaannik qinersisoqartassaaq, taannalu siulersuisunut ilaasortanngussaaq qinigaasoq qinigaaffiup ingerlanerani siulersuisunit tunuarpat.

 

Siulersuisut inissitsitissapput siulittaasup tullilerlutik.

 

Siulersuisut peqatigiiffeqarnermi politikkimi oqartussaasutut akisussaasuupput minnerpaamillu ukiumut marloriarlutik ataatsimiittassallutik.

 

Siulittaasoq ataatsimiigiaqqusisassaaq sivikinnerpaamik sap. akunnerinik pingasunik piffissaliilluni.

 

Siulersuisut telefonikkut ataatsimiittarsinnaapput.

 

Siulersuisut sulinerat GA-mut ilaasortaanermut akiliutinit akilerneqar

3tassapput.

 

Qinigaaffiup ingerlanerani siulittaasoq tunuarpat siulittaasup tullia nutaatut siulittaasunngussaaq tulliani ileqquusumik ataatsimeersuarnissap tungaanut. Imm. 1-imi aalajangersakkat malillugit siulersuisut siulittaasup tullissaanik nutaamik qinersissapput siulersuisuni ilaasortat akornanni.

 

Siulersuisut immikkut ittumik ataatsimiittarsinnaapput tamanna siulittaasup piumasarippagu imaluunniit siulersuisuni ilaasortat ikinnerpaamik pingasut piumasarippassuk. Ataatsimiigiaqqusisoqartassaaq nalinginnaasumik siulersuisunik ataatsimiigiaqqusisarnertut.

 

Siulersuisut aalajangiussaat allattorneqartassapput, taakkulu siulersuisunit akuersissutigineqartassapput.

 

Siulersuisut ingerlariaasissartik namminneq aalajangersartassavaat malittarisassat makkua naapertorlugit.

 

Siulersuisut aalajangiisinnaassuseqarput siulersuisuni ilaasortat ikinnerpaamik 2/3-ii ataatsimiinnermi najuuppata.

 

 

Peqatigiiffiup ulluinnarni allaffitsigut aqunneqarnera ingerlatseriaasissatut siulersuisut aalajangersagaat tunngavigalugit ingerlanneqartarpoq, pisortamit siulersuisunit atorfinitsinneqartumit aqunneqarluni.

 

Pisortaq toqqaannartumik siulersuisut ataanni inissisimavoq.

 

Pisortap atorfeqarnermini atugassarisai erseqqinnerusut, suliassai oqartussaaffeqarfiilu pisortatut isumaqatigiissummi siulersuisunit suliarineqarsimasumi aalajangersarneqassapput.

 

Pisortap siulersuisut isumasioqatigereerlugit brancheudvalginillu inassuteqareernikkut GA-p sulisartoqarnikkut isumaqatigiinniarneri isumagisassavai. Brancheudvalgit ataasiakkaat sulisartoqarnikkut isumaqatigiinniarnernut atatillugu isumaqatigiinniarnermut peqataatitassaminnik ataatsimik toqqaanissaminnut periarfissaqarput.

 

Isumaqatigiissutit tamatigut isumaqatigiissutigineqartassapput GA-p siulersuisuisa akuersissuteqarnissaat apeqqutaatillugu.

 

GA-p ulluinnarni suliassai allatseqarfiup isumagisassavai. Tamatuma saniatigut allatseqarfiup isumagisassavai siulersuisut brancheudvalgillu sinnerlugit allaffeqarnikkut suliassat.

 

Allatseqarfik pisortamit aqunneqassaaq.

 

Branceudvalgit sammisaqarfinnut tamanut peqatigiiffeqarnikkut politikki akisussaaffigaat.

 

Peqatigiiffeqarnikkut politikkimi siulersuisut aalajangigaat brancheudvalgit atuuttussanngortittarpaat.

 

Brancheudvalgit ulluinnarni ingerlatseriaasissartik ingerlatassatillu namminneq aalajangersartassavaat, GA-lli politikkianit aammalu GA-p siulersuisuisa brancheudvalginut ataasiakkaanut missingersuutinut aalajangersagaannit qilersorsimallutik, siulersuisunillu peqquneqarunik imaluunniit inanneqarunik tamakkua malittassallugit.

 

Ingerlanniakkatut pilersaarutinik GA-p siulersuisui ilisimatinneqartassapput, tamakkua aallartinneqannginnerini. Suliniutit annertuut pingaarutillillu siulersuisunit akuersissutigineqartassapput, tamannalu ilaatigut pisinnaavoq brancheudvalgit ataatsimiinnerisa imaqarniliornerinik siulersuisunut tunniussinikkut.

Brancheudvalgip aalajangiineri udvalgimi ilaasortamit kimilluunniit piumasarineqarsinnaavoq GA-p siulersuisuinut saqummiunneqarnissaat.

 

Siulersuisut peqatigiiffiup politikkianut qullersaallutik akisussaapput peqatigiiffiullu pingaarnertut poltikkianik anguniagaanillu maleruagassiussallutik.

 

Qitiusumik ilinniarfinni ataatsimiitaliat akimorlugit klubbiliornissaq siulersuisut aalajangiiffigisinnaavaat. Aningaasartuutit klubbini suleqataanermut tunngasut klubbini ilaasortanit aningaasaliiffigineqartassapput.

 

Immikkut illuinnartunik pissutissaqartillugu pissutsini kinguartinneqarsinnaanngitsuni siulittaasoq aalajangiisinnaavoq.

 

Tamatuma kingorna aalajangiineq piaarnerpaamik siulersuisunut akuersissutigineqartussatut saqqummiunneqassaaq.

 

 

GA-p naatsorsuutaasa qaammatisiutit malillugit ukioq malippaat.

 

GA-p naatsorsuutai kukkunersiuisumit naalagaaffimmit akunerisaasumit ataatsimeersuarnermilu qinigaasimasumit kukkunersiorneqartassapput.

 

 

Ga-p pisussaaffii taamaallaat GA-p aningaasaataanit aningaasalersorneqassapput.

 

GA avammut akisussaaffilerneqartarpoq siulittaasup siulittaasullu tulliata peqatigiillutik atsiornerisigut.

 

Pigisanik aalaakkaasunik tunisinermi, pisinermi qularnaveeqqusiussinermiluunniit aammattaaq pisariaqarpoq siulersuisut aalajangiinissaat aammalu siulittaasup siulittaasullu tulliata peqatigiillutik atsiornissaat.

 

 

GA-p siulersuisui aammalu qitiusumik ilinniarfinni ataatsimiitaliat pisortanik sulisartullu kattuffiinik isumaqatigiinniarnissamut pisinnaatitaapput, takuuk § 10.

 

Branchudvalgini ataasiakkaani ilaasortat ikinnerpaamik marluk imaluunniit siulersuisuni ilaasortat ikinnerpaamik pingasut tamanna piumasarippassuk isumaqatigiissutit taamaattut attuuttussanngortinneqannginneranni suliffeqarfinnut GA-mi ilaasortanut taasissutigineqaqqaarsinnaapput.

 

Taasinerup inernera nalinginnaasumik amerlanerussuteqarnikkut aalajangiiffigineqassaaq.

 

Isumaqatigiissutit § 10 aamma 13 malillugit naammassineqarsimasut ilaasortanit malinneqartussaapput.

 

 

Suliffeqarfiit GA-mi ilaasortaasut pisussaapput GA-p inatsisaanik aalajangersagaanillu il.il. malitsinissaminnut, sulisartoqarnikkullu isumaqatigiissutinik, GA-p sulisartullu kattuffiisa akornanni isumaqatigiissutigi-neqarsimasunik kiisalu ataatsimeersuarnermi aalajangiussanik siulersuisullu peqqussutaannik malitseqqissaarnissaminnut.

 

Suliffeqarfiit GA-mi ilaasortaasut pisussaapput kisitsisitigut misissuinernut atatillugu allatseqarfiup saaffiginnissutaanik tamanik akissuteqarnissaminnut.

 

Imm. 1 malillugu pisussaaffinnik unioqqutitsineq pillaatigalugu akiliisitsinermik kinguneqassaaq. Akiliisitsissutip annertussusissaa siulittaasumit aalajangerneqassaaq taannalu annerpaamik ilaasortap akissarsiarititaata 1 procentianik annertussuseqassaaq, minnerpaamillu 500 kr.-imik.

 

 

GA-mit ilaasortaajunnaarneq taamaallaat pisinnaavoq januarip aallaqqaataani aamma julip aallaqqaataani. Ilaasortaajunnaarneq allakkatigut nalunaarutigineqassaaq allatseqarfimmillu tiguneqareersimassalluni ilaasortaajunnaarnissap atuutilerfissaa kingusinnerpaamik qaammatinik pingasunik sioqqullugu.

 

Ilaasortarli suliffimminik ingerlatsiunnaarsimappat GA-mit ilaasortaajunnaartoqarsinnaavoq kvartalip suliffeqarfiup atorunnaarfiata naaneranit.

 

Suliffeqarfik ilaasortaasoq akiliisinnaajunnaartutut (akiitsoqarpallaartutut) suliarineqalerpat, imaluunniit akilersuinerminik unitsitsisimappat, GA-mit ilaasortaajunnaartutut nalunaarutigineqassaaq qaammatisiutit malillugit kvartalimi akiliisinnaajunnaarnerup imaluunniit akilersuinermik unitsitsinerup GA-mit ilisimaneqalernerata naaneranit, akiliisinnaajunnaarnermik (akiitsoqarpallaarnermik) imaluunniit akilersuinermik unitsitsinermik ingerlatsisup ilaasortaaginnarnissaq kissaatiginngippagu.

 

Siulersuisulli ilaasortaq ilaasortaajunnaarsissinnaavaat ilaasortap ilaasortaanermut piumasaqaatit naammassisinnaajunnaarpagit, takuuk § 3, imm. 1, imaluunniit ilaasortap pisussaaffiit atuuttut imaluunniit ilumoortuunissamut piumasaqaatit annertuumik sumiginnarpagit.

 

Ilaasortaajunnaarsitsinermik aalajangerneq siulersuisuni ilaasortat tamarmiullutik atsiortussaavaat.

 

Ilaasortaajunnaarsitsinissamik aalajangertoqarsinnaanngilaq ilaasortaq allakkatigut tammatsaalisakkut qaammat ataaseq qaangiutsinnagu oqaaseqaateqarnissaminik kajumissaarneqarsimatinnagu.

 

Siulersuisut ilaasortaajunnaarsitsinissamik aalajangernerat ingerlaannaq atuutilissaaq, taamaattoqassappat ataatsimeersuarnermi allanngortinneqarnissaata tungaanut, takuuk imm. 8.

 

Ilaasortaajunnaarsitsinissamik aalajangernerit tamarmik ataatsimeersuarnermi tulliuttumi saqqummiunneqartassapput, ilaasortaajunnaarsitsinermillu aalajangerneq atuuttussanngortinneqassaaq § 8, imm. 8-mi aalajangersakkat malillugit.

 

 

Peqatigiiffiup atorunnaarnissaa taamaallaat ataatsimeersuarnermi aalajangiunneqarsinnaavoq, ataatsimeersuariaqqusissummi allassimassalluni peqatigiiffiup atorunnaarsinneqarnissaa ataatsimeersuarnermi oqaluuserineqassasoq, aammalu GA-mi ilaasortat ikinnerpaamik 3/4-iisa allakkatigut qinnutigisimappassuk peqatigiiffiup atorunnaarsinneqarnissaa siunertaralugu ataatsimeersuaqqusinissaq ataatsimeersuaqataasussallu ikinnerpaamik 3/4-ii najuuppata.

 

Aalajangerneq akuersissutigineqassaaq ataatsimeersuartut ikinnerpaamik 3/4-ii akuersillutik taasippata.

 

Ataatsimeersuaqataasussat 3/4-iinik ikinnerusut najuuppata ataatsimeersuarnermi aalajangerneqarsinnaavoq nutaamik ataatsimeersuartoqarnissaa sivikinnerpaamik sap. akunnerinik sisamanik sivisunerpaamillu sap. akunnerinik arfinilinnik piffissaliussilluni, peqatigiiffiullu atorunnaarsinneqarnissaa kisiat oqaluuserisassaatillugu.

 

Ataatsimeersuarnermi peqatigiiffiup atorunnaarsinneqarnissaa akuersissutigineqarsinnaavoq ataatsimeersuaqataasut 3/4-ii akuersippata, ataatsimeersuaqataasut qanorluunniit amerlatigigaluarpata.

 

Peqatigiiffiup atorunnaarsinnissaanik siunnersuummut ilanngullugu siunnersuutigineqassaaq peqatigiiffiup aningaasaataasa sumut atorneqarnissaat.