GA > Medlemskab

Download pdf- Naatsukullammik Kalaallit Nunaanni Sulisitsisut

Kalaallit Nunaanni Sulisitsisut Peqatigiiffit – ineriartornermi salliuvoq

Kalaallit Nunaanni Sulisitsisut Peqatigiiffiata 1966-mili Kalaallit Nunaata inuussutissarsiornikkut soqutigisai aallaavigalugit sulivoq, ullumikkullu suliffeqarfiit ilaasortavut 500-t missaanniipput, 6000-illu missaaniittut, nuna tamakkerlugu inuussutissarsiornikkut ingerlataqarfinnut tamanut agguataarsimasut, sulisuullutik. Suliffeqarfiit mikisut akunnattumillu angissusillit allaallu ingerlatsivissuit nunani tamalaani niuerfinnik suleqateqartut ilaasortaapput. Kalaallit Nunaanni Sulisitsisut Peqatigiiffiat inuussutissarsiutit assigiinngitsut pillugit ataatsimiititanut qulingiluanut ilaasortaavoq.

Taamaalilluta Kalaallit Nunaanni inuussutissarsiornikkut suliniaqatigiiffiit annersaraatigut, tassami suliffeqarfiit amerlanersaannut sinniisaavugut inuussutissarsiornikkullu aningaasat kaaviiaartitat nuna tamakkerlugu 90 %-iisa missaat kaaviiaartittarlutigit.

Tamatuma suliffeqarnikkut aammalu nunap naalakkersuinikkut siuttuinut oqartussaasuinullu tunngatillugu Kalaallit Nunaanni Sulisitsisut Peqatigiiffiata qitiusumik inissisimanissaa qulakkeerpaa.

Kalaallit Nunaanni Sulisitsisut Peqatigiiffiata Kalaallit Nunaat tamaat suliffigaa ersarissumillu siunertaralugu inuussutissarsiornikkut sinaakkutissat sapinngisamik pitsaanerpaat pilersinnissaat. Tamatuma nassataraa Kalaallit Nunaanni Sulisitsisut Peqatigiiffiannut ilaasortaagaanni inuussutissarsiornikkut ineriartortoqarnissaanut toqqaannartumik sunneeqataasinnaaneq aammalu nukittorsaataasumik sulineq aqqutigalugu ataatsimoornissamik ammaassilluni.

Ilutigisaanik Kalaallit Nunaanni Sulisitsisut Peqatigiiffiat inuussutissarsiornikkut periarfissat atukkallu pillugit ilisimasanut qitiulluni katersuiffiuvoq. Kalaallit Nunaanni Sulisitsisut Peqatigiiffiata allattoqarfia ukioq kaajallallugu siunnersuinissamut ilitsersuinissamullu piareersimavoq – apeqqutaatinnagu ulluinnarni sulinermut apeqqutit mikisuunersut imaluunniit inatsisitigut aningaasatigullu piumasaqaatitalinnik apeqqutaanersut.

Allatut oqaatigalugu Kalaallit Nunaanni Sulisitsisut Peqatigiiffiat suliniaqatigiiffiuvoq ullunut nutaanut naleqqussarsimasoq ilaasortanik kiffartuussisoq, isummertarnernik sunniiniartartoq aammalu sullissinermut pingaarutillit pillugit siunnersuisartoq. Aammali inuussutissarsiutitigut ineriartorneq suliassatsinnut ilaatipparput. Inuussutissarsiutitigut ineriartornerup inuiaqatigiinnut sunniutigisinnaasai eqqarsaatigalugit. Taamaattumik pikkorissaanerit, ataatsimiinnerit, paasissutissiisarnerit kiisalu nunanut allanut paasisassarsiortarnerit angalatitsisarnerillu ingerlakkaluttuinnarpavut.

Kalaallit Nunaanni inuussutissarsiorneq

Kalaallit Nunaat ineriartupiloorpoq, tamatumalu ukiuni aggersuni inuussutissarsiornerup oqallisaaqqilernissaa nassatarisussaavaa. Inuussutissarsiutit ingerlanneqareersut – soorlu aalisarneq, nunanut allanut tuniniaaneq, niuerneq, kiffartuussineq, IT, tusagassiorneq, akunnittarfeqarneq takorniartitsitsisarnerlu, sanaartornermik suliffiuteqarneq, sanaartugassanik sananeq sanaartornerlu, assartuussineq kiisalu siunnersuisarneq – saniatigut suliassaqarfiit nutaat tassaasut aatsitassanik ikummatissanillu ujarlerneq, aatsitassarsiorneq il.il. annertusiartuinnartumik suliatsinnut ilaalerput.

Kalaallit Nunaanni Sulisitsisut Peqatigiiffiata qitiutillugit suliai sisamat:

Soqutigisaqaqatigiiffik

Soqutigisaqaqatigiiffittut Kalaallit Nunaanni Sulisitsut Peqatigiiffiata inuussutissarsiortunut pitsaanerpaanik sinaakkusiortoqarnissaa anguniarlugu naalakkersuinermik suliaqartunik sunniiniartarpoq. Tamatumani Kalaallit Nunaanni Sulisitsisut Peqatigiiffiata inuussutissarsiutitigut anguniagaanut iliuusissatut pilersaarutaa aallaavigineqarpoq taamaaliornerminilu pisortallu oqartussaasui qanimut oqaloqatigalugit ingerlalluni. Assersuutigalugu maannakkorpiaq siunnersuisoqatigiinni, ataatsimiititaliani aalajangiisartunilu aalaakkaasuni 20-ni Namminersorlutik Oqartussat ataanniittuni Kalaallit Nunaanni Sulisitsisut Peqatigiiffiat sinniisuutitaqarpoq, soorluttaaq aamma Namminersorlutik Oqartussat inatsisissanik piareersaanerani tusarniarneqarsinnaalluni.

Kiffartuussinermik suliniaqatigiiffik
Kiffartuussinermik suliniaqatigiiffittut Kalaallit Nunaanni Sulisitsisut Peqatigiiffiat inatsisitigut aningaasatigullu suliffeqarfinnut ilaasortaasunut siunnersuisarpoq, soorluttaaq aamma suliffeqarfiit assigiimmik suliaqartartut pillugit kisitsisigut paasissutissanik inatsisillu taakkununnga naapertuuttut pillugit ilitsersuutinik pisariaqartitsineq naapertorlugu suliaqartartugut.

Sulisitsisut kattuffiat

Sulisitsisut kattuffiattut Kalaallit Nunaanni Sulisitsisut Peqatigiiffiat suliffeqarnermi pissutsit pitsaasuunissaannik isumannaarinneqataavoq. Isumaqatigiissut pingaarneq aqqutigalugu aammalu isumaqatigiissutinik sisamanik sulinermik inuussutissarsiutillit kattuffiannik SIK-mik atsioqateqarnikkut tamanna pivoq. Isumaqatigiissutini sammineqarput sanasut, niuertut aamma allaffimmiut, nioqqutissiortut kiisalu assartuineq aammalu sullissineq. Taamaaqataanik aningaaserivinni sulisut pillugit Kalaallit Nunaanni Sulisitsisut Peqatigiiffiat Danmarkimi Finansforbund-ilu isumaqatigiissummik pingaarnermik isumaqatigiissusiorsimapput aammalu atsioqatigiillutik isumaqatiissusiorsimallutik.

Inuussutissarsiutit nutaat pillugit inuussutissarsiutinik siuarsaanermi suleqataaneq

Inuussutissarsiutit pioreersut nutaallu inuussutissarsiutigineqarnerisa ineriartortinneqarnerannut Kalaallit Nunaanni Sulisitsisut Peqatigiiffiat suliniuteqaqataanissamut pisussaaffeqarpoq, inuussutisarsiutit nutaat uani pineqartut tassaapput aatsitassarsiorneq, uuliasiorneq/gassisiorneq aammal kalaallit nerisassaataannik tunisassiorneq. Taamaalilluni ilisimasanik katersineq ilisimasallu iluaqutiginissaat, suleqatissarsiorneq aammalu assigiinngitsunik suliffiutillit suliffeqarfiillu pillugit nunani tamalaani attavissarsiornissaq Kalaallit Nunaanni Sulisitsisut Pieqatigiiffiata suliarai. Taamaaliorpoq kalaallit suliffeqarfiutaasa siunissami piumasaqaataalersussanut sapinngisamik pitsaanerpaamik atugaqalernissaat anguniarlugu.

Kalaallit Nunaanni Sulisitsisut Peqatigiiffata aqqissuussaanera: Suliffeqarfiit assigiinngitsunik suliallit, najukkami peqatigiiffiit naapittarfiillu

Kalaallit Nunaanni Sulisitsisut Peqatigiiffianni ilaasortatut suliffeqarfiup suliai suunersut apeqqutaatillugit peqataasoqartarpoq:

• Sanaartornermik suliallit

• Entreprenørit, tunisassiortut aammalu aatsitassalerisut

• Niuerneq

• Innaallagialerineq aammalu ruujorilerineq

• IT, Attaveqaqatigiinneq Tusagassiutillu

• Kiffartuussineq Assartuinerlu

• Akunnittarfiit, Neriniartarfiit Takornariaqarnerlu

• Aalisarneq aammalu Nunanut allanut tuniniaaneq

• Teknikkimut tunngasuni siunnersuisartut

Najukkami Peqatigiiffiit
Suliffeqarfiit ilaasortaasut aamma nunami sumiikkaluartut kattuffimmut ilaasortaasarput, tassami Kalaallit Nunaanni illoqarfinni tamangajanni Kalallit Nunaanni Sulisitsisut Peqatigiiffiat najukkami peqatigiiffeqarpoq. Taamaalillutik najukkami inuussutissarsiortut soqutigisaat isumagineqarput.

Suliffeqarfiit assigiimmik suliallit
Suliffeqarfiit assigiimmik suliallit ataatsimiititamit siulersorneqarput, tassani suliffeqarfiit assigiimmik suliallit ilaasortamik akornanni qinigaat pingasut-talliamat ilaasortaallutik. Suliffeqarfiit assigiimmik suliallit ataatsitimiititaliaanni siulittaasoq Kalaallit Nunaanni Sulisitsisut Peqatigiiffiata siulersuisuini ilaasortaavoq.

Suliassaqarfiit assigiinngitsut akimorlugit suleqatigiit
Kalaallit Nunaanni Sulisitsisut Peqatigiiffiannut ilaasortat sunik suliaqarnertik sumilu najugaqarnertik akimorlugu suleqatigiinnut peqataasinnaaput, tamatumani sammisat immikkut ittut qitiutinneqarlutik sammineqartarput taamaaliornikkut inuussutissarsiornermi pissutsit tunngavissaqarluartumik oqallisigineqarsinnaallutik aammalu inuussutissarsiornermi massakkorpiaq atukkat paasisaqarfigineqarsinnaallutik tamannalu aqqutigalugu inuussutissarsiornikkut atukkat pitsaasumik sunniuteqaqataaffigineqarsinnaallutik – tassa pisortat oqartussaasuinut, kommuninut aammattaaq suliffeqarfiit assigiinngitsunik suliallit akimorlugit suleqatigiinnermut tunngatillugu.

Kalaallit Nunaanni Sulisitsisut Peqatigiiffiata aaqqissuussaanera

Aallartitat ataatsimiittarnerat siulersuisuunerillu

Suliffeqarfiit assigiimmik suliallit ataatsimiititaliaanni siulittaasut qulingiluaasut saniatigut siulersuisut arfineq-pingasunik ilaasortaqarput taakkulu aallartitat ataatsimiinneranni Kalaallit Nunaanni kommuninit sisamaasunit (tamarmik immikkut marlunnik ilaasortaatitaqarlutik) qinigaapput. Qinigaasartut tassaapput kommunini ataasiakkaani ilaasortat akornanni ilaasortanit qinerneqartartut.

Siulersuisunut siulittaasoq Kalaallit Nunaanni Sulisitsisut Peqatigiiffiani oqartussaanerpaanit, tassa aallartitat ataatsimiinneranni ukioq allortarlugu pisartumi, qinerneqartarpoq.

Siulersuisut pisortassamik toqqaasarput, allatoqarfik peqatigalugu suliassat qulaani taagorneqartut suliarinissaannik isumaginnitussaq.

Ilaasortaaneq

Kalaallit Nunaanni Sulisitsisut Peqatigiffiannut toqqaannartumik ilaasortanngorniaraanni Kalaallit Nunaanni inuussutissarsiummik ingerlataqartunut nalunaarsuiffimmut (GER) normuligaalluni nalunaarsorsimanissaq kiisalu suliffeqarfimmi aqutsisutut Kalaallit Nunaanni najugaqartuunissaq piumasaqaataapput. Ilaasortaanermut tunngaviusumik akiliuteqartoqassaaq aammalu sulisut akissarsiaasa katinnerat aallaavigalugu akiliuteqartoqartassalluni.

Taaseqataasinnaanani ilaasortaaneq

Suliniaqatigiiffiit aammalu suliffeqarfiit nunanit tamalaaneersut, toqqaannartumik ilaasortaanissamut piumasaqaatinik naammassinninngitsut, taasisinnaatitaatanik Kalaallit Nunaanni Sulisitsisut Peqatigiiffiannut ilaasortanngorsinnaapput.

Taamatut ilaasortaariaaseq 2011-mi eqqunneqarpoq taamaaliornikkut suliffeqarfinnik nunanit tamalaaneersu nik suleqateqarnissaq nukittorsarniarlugu. Ilaasortaanermut akiliut aalajangersimasuuvoq akiliuteqartarnermut nalunaarsuiffimmi takuneqarsinnaasoq.

Ilaasortaanerup iluaqutissartai

Suliffeqarfiit Kalaallit Nunaanni Sulisitsisut Peqatigiiffiannut ilaasortaasut inatsisit isumaqatigiissutit, ilitsersuutit paasiuminartut, immersigassat kiisalu www.ga.gl aqqutigalugu qarasaasiakkut ujarlerfissat arlallit atorfissaqartitatik pisinnaavaat.

Taakku saniatigut Kalaallit Nunaanni Sulisitsisut Peqatigiiffiannut ilaasortat sammisat assigiinngitsut pillugit paasitinneqartarnikkut ilaasortaanertik iluaqutigisinnaavaat. Kalaallit Nunaanni suliffeqarfiit ilaasortaasut aqqutigalugit aammattaarli Kalaallit Nunaanni Sulisitsisut Peqatigiiffiata Danmarkimi suleqatai aqqutigalugit tamanna pisarpoq.

Kalaallit Nunaanni Sulisitsisut Peqatigiiffiata allattoqarfia ilaatigut siunnersuisartunik arlalinnik sulisoqarpoq, makkununngalu tunngasuni siunnersuisarluni:

· Kalaallit Nunaanni inuussutissarsiutit pillugit nalinginnaasumik paasissutissiineq

· inatsisit aningaasarsiornerlu pillugit ilitsersuineq

· misissueqqissaarneq kisitsisitigullu misissuineq

· pikkorissaanissanut ataatsimiinnissanullu qaaqqusinerit

· suliffeqarfinnut aammalu kalaallit inuussutissarsiummik ingerlataqartut angalanissaannut qaaqqusinerit

· qarasaasiakkut nutaarsiassat aammalu ilaasortanut atuagassiaq Aurora

· CSR Greenland pillugu paasissutissiineq

Kalaallit Nunaanni Sulisitsisut Peqatifiiffiisa suleqatai – nunami maani nunanilu tamalaani

Kalaallit Nunaanni Sulisitsisut Peqatigiiffiat Kalaallit Nunaannut tamarmut suleqatigiiffiuvoq, aammali Kalaallit Nunaata avataani suleqateqarluni, taamaaliornikkut suliffeqarfiit ilaasortaasut pitsaanerpaamik ullutsinnullu naleqqunnerpaamik kiffartuunnissaat siunnersornissaallu isumannaarparput.

Danmarkimi suleqatit ilaat makku taaneqarsinnaapput:

Dansk Byggeri, Dansk Erhverv og Horesta

Kalaallit Nunaanni Sulisitsisut Peqatigiiffiat nunani tamalaani suliniaqatigiiffinnut suleqatigiiffinnullu makkununnga ilaasortaavoq:

PDAC, NOIA, Offshore Center Danmark, MSC Fisheries

CSR Greenland

Kalaallit Nunaanni Sulisitsisut Peqatigiiffiat CSR Greenland-imut allattoqarfiuvoq suliffeqarfiillu inuiaqatigiinnut akisussaanerannut tunngasuni ilaasortanut siunnersuisarluni.

Kalaallit Nunaanni Sulisitsisut Peqatigiiffiata allattoqarfia:

Kalaallit Nunaanni Sulisitsisut Peqatigiiffiat
Postbox 73
Jens Kreutzmanipp Aqq. 3
3900 Nuuk
Grønland

+299 32 15 00

www.ga.gl & ga@ga.gl

Ilaasortanngorneq 1000 kr.-ninik akeqarpoq. Kingornagut ukiumoortumik akissarsiarititassatut missingersuutaat naatsorsuutigalugit akiligassiisoqartarpoq. Taanna ukiumoortoq qaammatit sisamakkaarlugit akiligassiissutigineqartassaaq. 2. kvartal 2011 til 1. kvartal 2013 akiliutigisartagassat ima isikkoqarput:

Kontingentstruktur pr. 1. januar 2013

	Ukiup sisamararterutaanut tunngaviusumik akiliut			Ukiumi ataatsimi akissarsiat katinnerat tunngavigalugu ilaasortaanermut akiliut
Suliffeqarfiit suuneri		Lønsum pr. år indtil 1.000.000	Lønsum pr. år over 1.000.000	indtil 1.000.000	af lønsum over 1.000.000
Sanasut illuliortartut *		1.500	1.500	0	0,47 %
Innaallagialerisut ruujorilerisullu *		1.500	1.500	0	0,47 %
Sanaartornermik suliffiutillit, tunisassiorneq aammalu Aatsitassanik qalluineq *		1.500	1.500	0	0,47 %
Siunnersuisartut *		1.500	1.500	0	0,47 %
Akunnittarfiit, neriniartarfiit takornariaqarnerlu**		1.500	1.500	0	0,47 %
Niuerneq		1.500	1.500	0	0,47 %
IT, attaveqatigiinneq tusagassiuutillu		1.500	1.500	0	0,47 %
Kiffartuussineq assartuinerlu		1.500	1.500	0	0,47 %

Suliffeqarfiit suuneri	Ukiup sisamararterutaanut tunngaviusumik akiliut			Ukiumi ataatsimi akissarsiat katinnerat tunngavigalugu ilaasortaanermut akiliut
Kilisaatit mikisut	2.500			0,47 %
Kilisaatit angisuut	6.250			0,47 %

2011-mi ukiup sisamararterutaasa aappaanni aammalu 2012-imi ukiup sisamararterutaasa siullianni ilaasortaanermut akiliut

Suliniaqatigiiffiit nunaqavissut taamatuttaaq suliffeqarfiit nunanit allaneersut GA-mut ilaasortanngorsinnaapput, immikkut piumasaqaatit siulersuisut aalajangersagaat malillugit. Taakku toqqaannartumik kattuffimmi nalunaarsorneqartassapput GA-mi qinersinerni il.il suniluunniit.taasisinnaanatik, taaseqataasinnaanatik aalajangeeqataasinnaanatillu.

Suliniaqatigiiffiit nunaqavissut nunanillu allaneersut taamatuttaaq suliffeqarfiit nunanit allaneersut ukiup sisamararterutaanut ilaasortaanermut akiliutaat 2.500 kr.-iussasoq aalajangersarneqarpoq. Ukiumi ataatsimi akissarsiat katinnerat tunngavigalugu ilaasortaanermut akiliisoqartassanngilaq.